Түлөөһэгүйгөөр аад, богони болзор соо шэнэ мэргэжэлдэ һураха арга боломжо 50-һаа дээшэ наһанай хүнүүдтэ олгогдоно. Ажалтайшье, мүн бэдэржэ байһаншье зон адагынь 16 сагай туршада, мүн хэдэн һарашье болбосоролой эмхи зургаануудай дэргэдэ һуража, мэргэжэлээ дээшэлүүлхэ аргатай.
- 2020 оной январь һарада мэргэжэлэй шэнэ стандартнуудай баталагдаһан ушарһаа иимэрхүү һуралсал эмхидхэһэнэй ашаар 50-һаа дээшэ наһанай хүнүүд ажалайнгаа һуурида үлэхэ аргатай болоно ха юм. Тиимэһээ иигэжэ мэргэжэл дээшэлүүлхэ һуралсал саашадаашье үнгэргэжэ байхабди, - гэжэ Ажаһуугшадые ажалаар хангалгын уласай агентствын дарга Александр Башкирцев тэмдэглэнэ.
Ажалаар хангалгын эмхи зургаанууд эгээл шухала мэргэжэлнүүдээр һуралсал ябуулна. Тиигэжэ түймэрэй аюултай хаһада бэлдэлгын хэмжээндэ Буряад Уласай ойн ажахынуудта хүдэлжэ, наһанайнгаа амаралтада гараха дүтэлһэн 181 хүниие һургажа гаргаа. Буряадай ойн үйлэдбэриин колледжын дэргэдэ тэдэнэр «Ойн түймэр сарагша» гэһэн мэргэжэл абажа, шэнэ стандартнуудай ёһоор ажалаа үргэлжэлүүлхэ аргатай болоо.
Шэнэ түхэлэй коронавирусай тараһан үедэ Яруунын, Хэжэнгын, Ивалгын аймагуудай эмнэлгын газарнуудта хүдэлдэг баһал 50-һаа дээшэ наһанай 82 хүн тусхай һуралсал гаража, COVID-19 халдаһан зониие аргалха талаар дүршэл абаа. Тэдэнэр Э.Р. Раднаевай нэрэмжэтэ Эмнэлгын колледжын бааза дээрэ холоһоо һуралсал гараа гээд тэмдэглэлтэй.
- Ородой Юрэнхылэгшэ Владимир Путинай «майн» зарлиг Алас Дурнын тойрогто бэелүүлгын шугамаар мэргэжэлэй болбосорол хүгжөөлгэ гээшэ шэнэ ниигэмэй-эдэй засагай бодолгын үндэһэн шэглэлнүүдэй нэгэн гэжэ тодорхойлогдонхой, - гээд, Александр Башкирцев хэлэнэ.
2019-2024 онуудта бэелүүлэгдэхээр түсэблэгдэһэн «Демография» гэһэн үндэһэн түсэл гүрэнэй удха шанартай табан түсэлһөө бүридэнэ гэжэ һануулая. Нэрлэбэл, «Үхибүүтэй болоһон гэр бүлэнүүдые мүнгөөр дэмжэлгэ», «Эхэнэрнүүдые ажалаар хангалга», «Ахамад үетэн», «Олониитын элүүр энхые һайжаруулга», «Спорт – амидаралай үндэһэн».
Telegram
TikTok
Youtube
ВКонтакте
Одноклассники
Twitter
RSS-лента
LIVE