Буряадай хүүгэд халуун эдеэгээр хангагдаха Буряад Уласай 65,5 мянганһаа дээшэ һургуулиин хүүгэд халуун эдеэгээр хангагдаха болобо. Ород Уласай Юрэнхылэгшын зууршалгаар гүрэнэй һанһаа энэ хэрэгтэ мүнгэн гаргашалагдаха юм.

Буряадай хүүгэд халуун эдеэгээр хангагдаха. Буряад Уласай 65,5 мянганһаа дээшэ һургуулиин хүүгэд халуун эдеэгээр хангагдаха болобо. Ород Уласай Юрэнхылэгшын зууршалгаар гүрэнэй һанһаа энэ хэрэгтэ мүнгэн гаргашалагдаха юм.

- Бидэ эхин ангиин бүхы хүүгэдые халуун эдеэгээр эдеэлүүлхэ тухай шиидэхэбэри абаабди, бүхыдөө 65,5 мянган хүүгэд. Арадай Хуралай үнгэрэгшэ  сесси дээрэ энээн тухай хуули абтаһан байха юм. Энэ бүхы асуудал шиидхэхэ болоходомнай, манай зарим һургуулинууднай тусхай эдеэ хоолой амяараа байшан үгы байна. Үсөөн һурагшадтай һургуулинуудта амяарань эдеэнэй газар барижа байха бэшэбди, юундэб гэхэдэ тэрэ эдеэнэйнь газарта һурагшадһаа олон мэргэжэлтэд ажаллаха болоно бшуу. Тиибэ яабашье нэгэ мүрыень олохобди, - гээд Уласай Толгойлогшо Алексей Цыденов дуулгана.

Һургуулиин эхин ангиин һурагшадые үдэр бүхэндэ халуун эдеэгээр эдеэлүүлжэ байха хэрэгтэ жэлэй дүүрэтэр Ород Уласай һанһаа 259 сая түхэриг хараалагданхай. Харин Буряад Уласта энэ хэрэгтэ 48, 5 сая түхэриг гаргашалагдаха. Тиихэдэ энэ халдабарита үбшэнэй һүжэрхэгүйн тула олон хүүгэдэй нэгэ дороо эдеэлхэ газарта Роспотреб хиналтын эрилтэнүүдые һургуулиин захирал дүүрэн хангаха зэргэтэй болоно. Гараа угааха, сэбэрлэхэ бодосууд тэндэ табигдаха. Хүүгэдэй ариг сэбэр сахиха журам жэншэдгүй дүүргэгдэжэ байха юм.

Байгша оной эхиндэ Буряад Уласай һургуулиин шабинар ерэхэ һуралсалай жэлдэ түлөөһэгүй халуун эдеэндэ хүртэхэгүй гэһэн һураг суу гараһан бэлэй. 467 һургуулинуудай 21-дэнь тусхай эдеэнэй таһалгагүй байһанһаа боложо энэ түсэлһөө гаргагдаһан байгаа бшуу. Зарим һургуулинуудта эдеэ хоол шанаха тусхай газарнуудые бэлдэхэ аргагүй. Ушар юуб гэхэдэ 20 гаран шабинартай һуралсалай эмхинууд ажаллажа байна ха юм.

-Юрэнхылэгшын табиһан бүхы эрилтэнүүдые бидэ дүүргэхэ ёһотойбди! Ушар тиимэһээ манай нютагай эхин ангиин һурагша бүхэн үдын хоол барихадаа түлөөһэгүйгөөр халуун эдеэгээр хангагагдаха ёһотой, - гээд Алексей Цыденов нэмэжэ хэлэнэ.

Энээһээ урид гэртээ олон хүүгэдтэй айлай, ганса бэеэ гэртэхинэй, тиихэдэ эрэмдэг бэетэй үхибүүд хүнгэлэлтэдэ хүртэдэг байгаа. Харин энэ һуралсалай жэлэй эхинһээ хуу булта үхибүүд үдын хоол барихадаа халуун эдеэндэ хүртэхэ эрхэтэй болобо бшуу.