Олон хүүгэдтэй бүлэдэ хүнгэлэлтэ Буряад Уласта олон хүүгэдтэй гэр бүлэнүүдые агта хүлэгэй түлөө гүрэнэй татабариһаа сүлөөлхэ тухай, хуулиин түсэл Засагай Газарай ээлжээтэ хуралдаан дээрэ зүбшэн хэлсэгдэһэн байна. Иимэ зууршалга Юрэнхылэгэшэ Федеральна Суглаанай гэшүүдтэ хандаха үедөө үгэһэн юм.  

Общество 16 августа 2020, 09:31 1081
Олон хүүгэдтэй бүлэдэ хүнгэлэлтэ

Олон хүүгэдтэй бүлэдэ хүнгэлэлтэ. Буряад Уласта олон хүүгэдтэй гэр бүлэнүүдые агта хүлэгэй түлөө гүрэнэй татабариһаа сүлөөлхэ тухай, хуулиин түсэл Засагай Газарай ээлжээтэ хуралдаан дээрэ зүбшэн хэлсэгдэһэн байна. Иимэ зууршалга Юрэнхылэгэшэ Федеральна Суглаанай гэшүүдтэ хандаха үедөө үгэһэн юм.

Хүн зоной ниитэ хамгаалгын албанай бэлдэһэн энэ хуулиин түсэл, олон хүүгэдтэй түрэлхидэй нэгыень, агта хүлэгэйнгөө түлөө гүрэнэй татабариһаа сүлөөлхэ гэһэн удхатай. Тэрэ агта хүлэгэйнь хүсэ шадал 200 мориной хүсэнһөө дээшэ байха ёһогүй. Гэртээ хоер гурбан түмэр хүлэгтэй һаа ганса нэгэнэйнгээ түлөө иимэ хүнгэлэлтэдэ хүртэхэ аргатай болоно бшуу.

- Гэртээ олон хүүгэдтэй түрэлхид ехэнхидээ багтаамжатай, томо  агта хүлэг худалдажа абахаяа оролдодог. Харин тиимэ унаагай түлөө гүрэнэй татабаринь ехэшэг байдаг, - гээд Ниигэмэй хамгаалгын яаманай сайдай орлогшо Анастасия Меринова хэлэнэ. – Энэ хуулин түсэл зохёоходо олон хүүгэдтэй гэртэхин, залуу айл бүлэнүүд өөһэдөө оролсоһон юм, - гэжэ сайдай орлогшо нэмэнэ.

Олон хүүгэдтэй гэртэхин ерэхэ 2021 онһоо эхилжэ иимэ хүнгэлэлтэдэ хүртэхэ юм гээд мэдээтэй юм байна. Уридшалан тоологдоһон мэдээгээр тусэлэй аргаргаар 30,2 сая түхэриг мүнгэн алмагдаха болоно. Гурбанһаа дээшэ хүүгэдтэй гэртэхиндэ иимэ хүнгэлэлтэ Ород Уласай 26 можо нютагуудта үзүүлэгдэнэ. Тэрэнэй тоодо манай хүршэ Эрхүү можо ородог юм.

- Энэ хуулиин түсэл Арадай Хуралай ээлжээтэ сесси дээрэ зүбшэн хэлсэгдэхэ юм, - гээд Засагай Газарай мэдээсэлэй албан дуулгана.

Арадай Хуралай һунгамалнууд тус түсэл дэмжэжэ, хуули болгожо абтабалнь олон хүүгэдтэй гэртэхиндэ, залуу айл бүлэнүүдтэ һураггүй дэмжэлгэ боложо үгэхэ. Алмаһан мүнгэеэ үхибүүдээ нэмэлтэ һургуули үзүүлхэ, спортын талаар һорилго хэхэдэнь гаргашалха болоно ха юм. Мүнөөнэй сагта олон хүүгэдые тэжээхэ гээшэ тиимэшье бэлэн хэрэг бэшэ гээд ойлгохо хэрэгтэй. Бултандань һургуулиин хэрэгсэлнүүдһээ эхилээд, хубса хунар абаха гээшэ тон ехэ гаргашатай. Энэ хэрэгтэ гүрэнэй талаһаа туһаламжа үзүүлэгдэбэшье алта мүнгэн үлүү болохо аал. Тиимэһээ энэ түсэл тон хэрэгтэй болоно.

29 марта