Баунтын аймагта һүүлэй 2 жэлэй туршада ниигэмэй удха шанартай аяар 6 байшангууд баригдаа, заһабарилагдаа Алексей Цыденов албанай хэрэгээр Баунтын аймагаар ябахадаа, үндэһэтэнэй түсэлэй ашаар бэелүүлэгдэжэ байһан барилга болон заһабарилгын газарнуудта хүрэһэн байна.

Общество 11 августа 2021, 13:16 677

Буряад Уласай толгойлогшо Алексей Цыденов албанай хэрэгээр Баунтын аймагаар ябахадаа, үндэһэтэнэй түсэлэй ашаар бэелүүлэгдэжэ байһан барилга болон заһабарилгын газарнуудта хүрэһэн байна. Иимэ түсэлнүүд Багдарин, Романовка болон Маловский гэһэн һууринуудта бэелүүлэгдэнэ гээд тэмдэглэлтэй.

- Үндэһэн түсэлэй аргаар ямар ехэ ажал хэгдэжэ байһыень та бүгэдэн өөрынгөө хоёр нюдөөр хаража байнат. Нёдондо жэл Маловский тосхондо һургуулиин байшан заһабарилагдаа, Усть-Джилиндэдэ спортзал баригдаа, мүнөөдөө Романовка һууринда соёлой байшан һэльбэн шэнэлэлгэнь дүүрэжэ байна. Нютагай зоной эдэбхи гаргаһаниинь ехэл һайшаалтай. Эндэхи олзын хэрэг эрхилэгшэ хубингаа 70 сая мүнгэ оруулһан байна. Иигэжэ бултанай оролдоһоной ашаар иимэ ехэ хэрэг бүтэжэ байна, - гэжэ Алексей Самбуевич хэлэнэ.

Тамир

Аймагай түб һууринда амаралгын болон соёлой парк һэльбэн шэнэлэгдээ. Тэндэнь тамирай элдэб хэрэгсэлнүүд тодхогдоо. Хүл бүмбэгэ, хоккей, гар бүмбэгэ наадаха талмайнууд түхэеэргэдээ. Эдэ бүхы юумэн уласай түсэлэй аргаар бүтэбэ гэжэ хэлэлтэй. Тамирай талмайнуудые зохёон байгуулха, барилга хэхэ хэрэгтэ нютагай дэбисхэр дээрэ олзын хэрэг эрхилдэг эмхинүүд яһала туһална.

Элүүр энхые сахиха хэрэг

Хүүгэдэй нарайлалгын байшан баригдажа дүүрэхэнь дүтэлөө. Зарим ажалынь Юрэнхылэгшын үгэһэн зарлигай ёһоор хэгдэжэ байна. Гэхэтэй хамта тус эмнэлгын газарта аяар 39 тусхай шэнэ оньһон түхеэрэлгэнүүд абтаха гэһэн захирамжа бии юм. Нёдондо  Россошино болон Монгой һууринуудта шэб шэнэ ФАП-ууд бүхыдөө 9 сая түхэригтэ баригдаһан юм.

Мэргэжэлтэдтэ гэрнүүд

Нютагай өөһэдын байгууламжын хүсөөр эмшэдтэ гэрнүүд баригдана. Энэ хэрэгтэ 5,2 сая түхэриг гаргашалагдаха юм. Эгээл иимэ түсэлэй ёһоор багшанарта баригдаһан нэгэ гэр уласай толгойлогшодо харуулба.

Соёл уралиг

Һаядаа Романовка нютагта шэнээр баригдаһан соёлой байшан үүдээ сэлин нютагаархидаа угтаха. 2013 ондо тус байшан ашаглагдахань аймшагтай болоо гэжэ мэргэжэлтэд элирүүлһэн юм. 2019 онһоо эхилжэ 150 хүнэй һууритай шэнэ байшан баригдажа эхилээ һэн. Тус барилгада бүхыдөө 12,9 сая түхэриг мүнгэн гаргашалагдаа.   

29 марта