Бүхыдөө 450 һууритай һургуулиин байшан бариха тухай ажалай хэрэгээр ябахадаа Буряадай Толгойлогшо үгэһэн юм. һургуулиин барилга энэ жэлдэ эхилээ, энэ хэрэгтэ 619 сая гаргашадагдаха.
- Барилга түсэбэй ёһоор 2023 ондо дүүрэхэ. Харин мүнөө барилга түсэбһөө һүүлдэжэ ябана гээд элеэр харагдана. Аймагай захиргаанда мүн барилгашадта ажалаа эршэтэйгээр ябуулхыень хэлэһэн байнаб. Багшанар болон ажалшад дүүрэн хэм соогоо. Һургуулиин ашаглалгада тушаагдаһанай һүүлээрнь ажалшадай тоо дээшэлүүлэгдэхэ, - гэжэ Алексей Самбуевич хэлэбэ.
Шэнэ һургуулиин байшан 3 дабхартай, 6 мянганһаа дээшэ дүрбэлжэн метр талмайтай болохо. Хажуудань хэмэл хушалтатай тамирай талмай баригдаха. Барилгын дүүрэхэ болзорһоо һүүлдэхэгүйн тула ажалшадай тоо дээшэлүүлэгдэнэ.
- Ажалшадые абанабди. Хоёр халаан хүдэлхэ зорилготойбди. Мүнөөдэрэй байдалаар бетон шудхалгын ажалда 70 гаран хүн хүрэхэ. Һүүлээрэнь барилгашадай ондоо бүлэг ерэхэ, тиихэлэрээнь бидэ газарһаа дээшээ гарахабади, - гэжэ ООО «Витим» гэһэн барилгын эмхиин захирал Александр Башлеев үгэ үгэбэ.
Һургуулиин байшан «Хүдөө һуурин хүгжөөлгэ» гэһэн Үндэһэтэй түсэлэй аргаар баригдана. Тус түсэлэй гаршаг доро урилдаанада шалгарһанай туһаар субсиди абажа одоолшье барилгын ажал бүтэхэ тээшээ болоһон байна. Ашагта малтамал олзоборилдог «Озерное» эмхи Яруунын аймагай захиргаантай хэлсээ баталһанайхи 55 сая түхэриг гаргашална. Үшөө түрүүн түсэл болон гаргаша баталһан данса бүридхэхэ хэрэгтэнь 4 сая үгэһэн юм.
Гэхэтэй хамта «Һуралсал» гэһэн Үндэһэтэнэй түсэлэй ашаар Эгэтын тусхай дунда һургуулиин байшан һэльбэн шэнэлэгдэнэ. Нёдондо жэлдэ Нарһатын, Шэрэнгиин, һургуулинуудай байша мүн Поперечное нютагай һургуулиин тамирай зал шэнэлэгдээ һэн.
Сэбэр һаруул һургуулиин байшанда ном үзэжэ гараһан хүбүүд басагад саашадаа түрэл нютайгаангаа, Буряад оронойнгоо хүгжэлтэдэ олоһон мэдэсэеэ оруулхал байха. Үнэхөөрөөшье эрдэм номтой хүн хаанашье хэзээдэшье газардахагүй. Тиимэһээ ургажа ябаһан хүүгэдтээ һайн шанартай эрдэм олгохо ёһотой.