Монгол хэлэнэй болон соёлой түб Буряад орондо нээгдэбэ Һуралсалай энэ эмхи I ректорнуудай Хуралдаанай үедэ нээгдэбэ.

Ород Уласай эрдэм ухаанай болон дээдэ һуралсалай яаманай, Монгол Уласай һуралсалай яаманай, Буряад Уласай Толгойлогшын, Монголой болон  Д.Банзаровай нэрэмжэтэ Буряадай ехэ һургуулинуудай оролдолгоор Монгол хэлэнэй болон соёлой түб нээгдэбэ. Һуралсалай энэ эмхи I ректорнуудай Хуралдаанай үедэ нээгдэбэ. Тус хуралдаан Улаан-Үдэ хотодо ажалаа ябуулна.

Нээлгын баяр ёһололой урдахана Монголой һуралсалай яаманай сайд Пурэвсурэнгийн Наранбаяр, Ород Уласай эрдэм ухаанай болон дээдэ һуралсалай яаманай сайдай орлогшо Константин Могилевский хоёр уулзажа хэлсээндэ гарнуудаа табибад.

- Ород Улас болон Монгол орон хоёр харилсаа холбоо байгуулха тухай хэлсээ баталба. Хоёр талын оюутад соёл, хэлэ тон гүнзэгыгөөр шудалха аргатай болобо, - гэжэ Константин Могилевский хэлэбэ.

Монгол хэлэнэй мүн соёлой түб – ТОMFL шалгалта бариха газар дэлхэй дээрэ гансахан түб болоно.

-Аха дүү монголшуудай Буряад орондо иимэ түб нээхэ гэһэн шиидхэбэринь тон һайшаалтай. Нэгэ түүхэтэй, мүнөөдэрэй болон ерээдүйн байдалтай арад түмэн гээшэбди. Дээдэ һургуулинуудай толгойлогшонорой Улаан-Үдэ хотодомнай сугларжа, ажаллажа байхадань баяртай байнабди. Бүхы юумэн Буряад ороноймнай хүгжэлтын түлөө туһалжа байхань болтогой! – гэжэ Алексей Цыденов хэлэбэ.

Монголой һуралсалай яаманай сайд Пурэвсурэнгийн Наранбаяр өөрынгөө талаһаа болон Монгол Уласай дээдэ һургуули энэ түбэй ажалдань туһалалсажа байхабди гээд найдуулаа.

-Монголдомнай Цэндийн Дамдинсурэн, Бямбын Ринчен мэтэ мэдээжэ шэнжэлэгшэд байха. Тэдэнэй ажал үргэлжэлүүлэгшэдые энэ түбтэ багшалхаарнь эльгээжэ байхабди, - гэжэ Монгол Уласай һуралсалай яаманай сайд Наранбаяр хэлэбэ.