Шэнэ амбулатори

Буряад Уласай толгойлогшо Яруунын аймагаар ажалайнгаа хэрэгээр ябахадаа Мужыха нютагай эмнэлгын газарай нээлгын баяр ёһололдо хабаадалсаһан байна. Тус барилга «Элүүр энхэ» гэһэн Үндэһэтэнэй түсэлэй аргаар бэелүүлэгдэбэ. Бүхыдөө 11 сая түхэриг барилгада гаргашалагдаһан байна.

- Энэ баярта хэрэгээр ажаһуугшадые амаршалха байнаб. Иимэ түхэлэй ФАП-ууд Буряад Уластамнай яһала олоор баригдана. Энэмнай манай Юрэнхылэгшын өөрөө үгэһэн заабари болоно. Мүнөөдэрэй байдалаар 76 шэб шэнэ амбулаторинууд баригдаа. Бүхы юумэн һайн лэ байг даа, эндэ ерэхэ шалтаггүй һуугыт даа, - гэжэ Алексей Цыденов үгэ абахадаа хэлэбэ.

Тус эмнэлгын газарай байшан оройдоол 2 һарын туршада баригдажа ашаглалгада тушаагдаба. Тэрэнэй талмайнь 126,5 дүрбэлжэн метр болоно. Хүлеэн абаха, зониие үзэхэ, тарилга хэхэ таһагууд мүн тиихэдэ эхэнэрнүүдые үзэхэ таһаг түхеэрэгдээ. Эм домуудые хадагалха, үбшэнтэнэй саг зуура тэндэ оршохо таһагууд байха.

- Үндэһэтэнэй түсэлэй аргаар иимэ шэб шэнэ байшантай болообди. Саг соонь барилга хэһэн ООО «Каркас» гэһэн эмхиин захиралда баярые хүргэхэ байнабди, - гэжэ Яруунын аймагай засаг дарга Чингис Цыренжапов дуулгана.

Мужыха нютагай ФАП-ай мэдэлдэ Эгэтэ болон Поперечное хоёр нютагуудай эмнэлгын газарнууд ороно.

- Һаруул шэнэ байшантай болоһондоо бидэ ехэ баяртайнууд байнабди. Үлзытэ, Эгэтэ Мужыха нютагуудай ажаһуугшад эндэ ерэхэ болоно. Холо ошохонь бэрхэтэй даа, харин мүнөө эндээ үзүүхэ болоһомнай гоё даа. Энэ барилгада оролсоһон хүн бүхэндэ һайниие хүргэхэ байнабди, - гэжэ нютагай аха захатан Надежда Кудрина хэлэбэ.

Мужыха нютагай эмнэлгын газар Яруунын аймагта хоёр жэлэй туршада баригдаһан 3-дахи амбулатория болобо. Энээнһээ урид Гүндэ болон Тэлэмбэ нютагуудта тон иимэ амбулатори бодхоогдоо һэн. харин 2021 ондо Яруунын түб һуурин Нарһатада эмнэлгын газарай байшангууд һэльбэн шэнэлэгдэһэн юм.

Хүдөө һууринда ажаһууга арад зондо иимэ эмнэлгын газарнууд яаха аргагүй туһатай болохо. Зарим ушарта аймагай түб хүрэтэр яһала саг һаладаг, тиимэһээ нютагтаа эмшэнтэй байха гээшэ тон шухала хэрэг.