Сэрэгшэдые дэмжэнэ

Буряад Уласта сэрэгэй тусхай үйлэ хэрэгүүдэй ветерануудта ажал олохо ба тэдэниие шэнэ мэргэжэлтэй болгохо талаар туһа үзүүлнэ.
Нютаг можодо сэрэгэй тусхай операциин ветерануудта ба хабаадагшадта ажал олохо ба шэнэ мэргэжэлтэй болохо талаар туһа үзүүлэгдэнэ.

- Агентство ветерануудта ба тэдэнэй гэр бүлэнүүдэй гэшүүдтэ таарамжатай гурбан программа бэелүүлнэ: «Ажалда абталгын эдэбхитэй политика», һуралсалай түлөө түлэхэ болбосоролой үнэмшэлгэнүүд ба үндэһэтэнэй «Кадры» түсэл, - гэжэ Ажалаар хангалгын Улас түрын агентствын хүтэлбэрилэгшын орлогшо Цырен Дармаев тэмдэглэбэ.

Жэлэй эхинһээ хойшо агентство руу сэрэгэй тусхай үйлэ хэрэгүүдэй 45 хабаадагша хандаһан байна. Тэдэнэй зургааниинь ажалтай болоо, харин юһэн хүн шэнэ мэргэжэлдэ һурана. Тэрэнэй хажуугаар уласай Толгойлогшо Алексей Цыденовэй үүсхэлээр «Буряадай патриодууд» гэжэ программа ябуулагдажа эхилээ. Тус программада сэрэгэй тусхай үйлэ хэрэгүүдэй 400 гаран ветеран хабаа-даха хүсэлөө
мэдүүлээ. Болбосоролой курсада 35 хүниие абаха юм.

- Һуралсал гараһан зон гүрэнэй ба нютагай засагай органуудта, уласай дэбисхэр дээрэхи томо үйлэдбэринүүдтэ ажалда абтаха, - гэжэ «Эсэгэ ороноо хамгаалагшад» жасын Буряад Уластахи таһагай хүтэлбэрилэгшэ Илья Михалёв тэмдэглэбэ.

Гэхэтэй хамта Ажалаар хангалгын Улас түрын агентство һуралсалай түрүүшын ээлжээндэ тудаагүй ветерануудтай ажал үргэлжэлүүлхэ. Сэрэгэй тусхай үйлэ хэрэгүүдэй ветеран Мунко Цымпилов программаар һураха эрмэлзэлэгшэдэй нэгэн болоно. Тэрэ уласай хүгжэлтэдэ хубитаяа оруулха хүсэлтэй, тиимэһээ программада хабаадаха захяа эльгээгээ.

Байгша оной март һарада болбосоролой программада хабаадаха дуратай зониие бүридхэлгэдэ абажа эхилээ һэн. Мунко Цымпилов арга шадалаа туршаха гэжэ шиидээд, шэлэн абалгын бүхы шатануудые гараа. Мүнөө тэрэ дүнгүүдые хүлеэжэ байна.

Мунко Цымпилов 2018 ондо Эхэ ороноо хамгаалха зорилготойгоор хэлсээ баталжа, сэрэгшэдэй тоодо ороо һэн. Сэрэгэй тусхай үйлэ хэрэгүүдтэ түрүүшын үдэрнүүдһээ хабаадаа. Мүнөөдэр тэрэ гүрэнэй «Эсэгэ ороноо хамгаалагшад» жасын Буряад Уластахи таһагта ниигэмэй тэнсүүлэгшээр ажаллана.