Буряад Улас болон Хитадай Хайнань олтирог хоёрые сэхэ холбохонь Буряадай Толгойлогшо Алексей Цыденов Хайнань олтирогой аяншалгын нэгэдэлэй түрүүлэгшэ Дун Чжэн гэгшэтэй уулзаба.

Буряадай Толгойлогшо Алексей Цыденов июлиин 14-дэ Хайнань олтирогой аяншалгын нэгэдэлэй түрүүлэгшэ Дун Чжэн гэгшэтэй уулзаба. Хитадай түлөөлэгшэд Буряад оронтой аяншалгын талаар сэхэ холбоо байгуулха дуратай байһанаа мэдүүлээ. Улаан-Үдэ - Санья гэһэн чартерна эрьесэ байгуулха тухай тэдэ хоер хөөрэлдэхэһөө гадна заншалта бэшэ эмнэлгэ хэлсэбэд.

-Улаан-Үдэ-Санья хотонуудай хоорондо ниидэхэ зам тайлаха тухай зугаа барибабди. Намарай эхин һарын һүүл багаар түрүүшын самолет ниидэхэ байха. Аяншалгын «ЖАССО ТУР» эмхи энэ талаар ажаллаха. Эдэ үнинэй бэеэ һайн талаһаа харуулһан найдамтай байгуулга, - гэжэ Алексей Цыденов хэлэбэ.

Хэлсээнэй түсэлдэ заншалта бэшэ эмнэлгын һалбари хүгжөөхэ тухай хөөрэлдөө. Буряадай Толгойлогшо хитадай түлөөлэгшэдтэ өөрынгөө талаһаа дурадхаха түсэлнүүдтэеэ танилсуулаа. 

-Буряад орон 4-хи удаа ерэжэ байнаб. Юундэ ходо ерэнэбши гэхэдэ, энэдэ ехэл һайнаар айлшадые угтан абадаг, амтатай эдеэгээр хүндэлдэг. Саашадаа бидэ хоёр талаһаа холбоо харилсаагаа бэхижүүлхэбди, - гэжэ Хайнань олтирогой аяншалгын нэгэдэлэй түрүүлэгшэ Дун Чжэн хэлэбэ.  

Энэ уулзалга хадаа Буряад Уласай аяншалгын яаманай олон жэлэй туршада хэһэн ажалайнь дүн болоно. Яаманай мэргэжэлтэд нёдондо Хайнань олтирог ошожо холбоо харилсаа байгуулһан байна.

Байгша оной могой һарада «Baikal Travel Mart 2025» дэлгэсэ болоходонь Санья хотын 12 аяншалгын эмхинүүд хабаадаа.