Гүрэнэй туһаламжада хүртэжэ

Ивалгын аймагай фермер Тимур Пурбуев эбэртэ бодо мал үсхэбэрилнэ. Тиихэдээ имагтал залуу мал шахан таргалуулна.

Гүрэнэй дэмжэлгэ грантын гуримаар хүдөөгөөрхиндэ яажа туһалнаб гэжэ тэрэнэй ажахы бодотоор харуулна. «Эдеэ хоолой аюулгүй талаар технологическа хангалта» гэһэн үндэһэтэнэй түсэлтэй тааралдуулан, грантнуудай ашаар ажахыгаа үргэдхэжэ, мүнөө үеын оньһон түхеэрэлгэнүүдые нэбтэрүүлхэ аргатай болоно.

Тимурай ажахы анхан түрэлхидэйнь үмсын ажахыһаа эхи абаһан юм. 2014 ондо тэрэ гэр бүлөөрөө ажахыгаа үргэдхэхэ гэжэ шиидээд, хуулитаар КФХ боложо, малайнгаа тоо толгой олошоруулжа эхилээ. Мүнөө мяханай үүлтэрэй мал тэжээн шахана.

- Энэ манай гэр бүлын хэрэг лэ даа. КФХ байгуулһаарнай, арба гаран жэл болошобо. Шахамал малай мяхан ехэл хэрэгтэй, яһала һайн наймаанда гарана. Тиимэһээ ажахыгаа үргэдхэжэл байнабди, - гэжэ Тимур хөөрэнэ.

Тимур Пурбуев урдын заншалаар малаа бэлшээридэ гаргажа харууһалнагүй, тиихэдэ мал удаанаар өөдөө болоно ха юм. Тэрэ бэлэн хоолоор малаа тэжээнэ. Хашарагуудынь хашаалаатай газарта байлгагдажа, бүхы хэрэгтэй юумээр хангагдаһан хоолоор тэжээгдэнэ. Тиихэдээ жэлэй туршада амиды шэгнүүрынь 550 кг хүрэнэ. Энэмнай малаа бэлшээжэ үдхэхэһөө 2-3 дахин түргэн болоно.

- Бидэ мяхалиг үүлтэрэй буруудые, ехэнхидээ сагаан толгойто казах үүлтэрэй хашарагуудые абанабди. Тэдэ түргэн таргалдаг, мяханиинь, ородоор хэлэбэл, «мраморна», тон шэмэтэй. Манай шахаһан малай мяхан шэмэтэйшье, зөөлэншье - аман соо бүри хайлажа байдаг. Юундэб гэхэдэ, байрадаа дураараа эдеэлээд лэ, хаанашье ябангүй, налайжа байна ха юм, – гэжэ бэрхэ малшан тайлбарилна.

2021 ондо Тимур Пурбуев Хүдөө ажахын яаманай соносхоһон «Гэр бүлын фермэ» гэһэн грант абажа шадаа. Тэрэ мүнгөөрөө бүдүүн холимог тэжээл хадагалжа байха шэнэ байра баряа. Хото хорёогоо мүнөө үеынхеэр хашаалаа.

- Мүнөө таанадай хаража байһан оньһон хэрэгсэл болон олон толгой мал худалдажа абаабди, хэрэгтэй барилгануудые бодхоогообди, хорёолообди. Энэмнай ямар ехэ туһа гээшэб даа. Шадалаараал хүгжэхэеэ оролдохомнай, - гэжэ Тимур хөөрэнэ.

Грантова түсэлнүүд Оросой Юрэнхылэгшэ В.В. Путинай сэхэ заабаряар бэелүүлэгдэнэ. Хүдөөгэй багашаг ажахынуудые дэмжэхэл ёһотойбди гэжэ нэгэнтэ бэшэ Юрэнхылэгшэ өөрөө дабтажал байдаг.

- Саашадаашье хүдөө ажахые дэмжэжэ, туһалжа байхабди. Тэрэ тоодо бага ажахынуудай хүгжэлтэдэ, ажахыгаа үргэдхэхэ хэрэгтэнь болон гадаада наймаанда гарахадань туһалжа байхабди, - гэжэ гүрэнэймнай түрүүлэгшэ мэдүүлнэ.

Буряад Уласаймнай Засагай газарай Түрүүлэгшын орлогшо-хүдөө ажахын болон эдеэ хоолой сайд Амгалан Дармаев грантова туһаламжын ехэ хэрэгтэйе тодоруулан тэмдэглэнэ:

- Хүдөө ажахын болон эдеэ хоолой яаманай грантнууд – эдэмнай миин лэ мүнгөөр дэмжэлгэ бэшэ, харин хүдөөгэй ажахынуудай саашанхи хүгжэлтэдэ шэглүүлэгдэһэн ехэ зөөри зөөшэ. Тэдэ һомололгонууд ажахыгаа үргэдхэжэ, шэнэ оньһон аргануудые хэрэглэжэ, ажалаа бүхыдэнь арьбадхаха, шэнэ дэлгүүрнүүдтэ гараха арга мүрнүүдые олгоно ха юм. Тимур Пурбуевай жэшээһээ харахада, грантова дэмжэлгэ гээшэмнай үнэхөөр туһална, хараһаар байтар үрэ дүнгүүд туйлагдана.

Мүнөө Тимуртанай ажахы үргэдэжэл байна гэжэ хэлэе.