Буряад ороной һургуулинуудта шэнэ автобусуудай түлхюурнүүдые барюулаа Энэ жэлдэ нёдондонойхидо орходоо, 13 авто-унаагаар олон ерээ.

Буряадта һургуулиин автобусууд туйлалтын шэнэ үндэр абажа байна. Энэ жэлдэ нёдондонойхидо орходоо, 13 авто-унаагаар олон ерээ. Тийн түрүүшынхиеэ машинануудай тоо табиие дабаба.

Түлхюурнүүдые барюулгын ээлжээтэ ёһолол ниислэлэй гол талмайда үнгэрѳѳ. Ямар нютагай үхибүүд һургуулидаа аятай зохидоор хүрэхэ аргатай болобоб?

Һургуули тухай дурсалганууд ганса хэшээлнүүд тухай бэшэ, мүн яагаад һургуулидаа хүрэжэ байһан тухайгаа нилээн һанадагбди. Тиибэ яабашье нүхэдтэеэ иимэ автобусуудаар хэшээлнүүдтээ ошоходо, һураггүй һонин гэжэ һанагдана. Эгээл иимэ арга боломжо Буряадай бүхы аймагуудай һурагшадта бии болоо. Эгээл дүтынхидһөө эхилээд, эгээл холо аймаг хүрэтэр манай һургуулинууд шэнэ унаатай болоо.

Зэдын аймагай Петропавловка тосхоной һургуулиин захиралай уялга дүүргэгшэ Ирина Кулюшина: Манай тосхон 1025 үхибүүдтэй гэжэ тоо баримтанууд харуулна.

- Энэнь гурбадахи автобус болобо гү?

- Тиимэ, гурбадахи шэнэ автобус.

- Та энэ унаагаа яагаад хэрэглэхэбта?

- Элдэбээр хэрэглэхэбди. Манай үхибүүд аймагай болон уласай хэмжээ ябуулгануудта саг үргэлжэ хабаадана. Тиимэһээ иимэ унаа бидэндэ хододоо хэрэгтэй байдаг.

Түнхэнэй аймагай Зүн-Мүрэнэй дунда һургуулиин захирал Зopигмa Maнтypoвa: Манай һургуулида Citroen Jumper гэжэ автобус бии, тэрэ юһэн жэл ябажа байна. Харин мүнөөдэр «Гaзeль Heкcт» гэжэ автобус абаабди.

- Тэрэ гэхэдэ, 9 жэл соо шэнэлэлгэ үгы байгаа гү?

- Тиимэ, бидэ ехээр баярлажа байнабди. Һургуулиин бүхы ажалшадшье, үхибүүдшье баяртай байна!

Бүхыдөө хоёр янзын автобус уласта ерээ. Жэшээнь, би мүнөө «Гaзeль Heкcт» автобуста ороноб. Тэрэ 16 һууритай. Газааһаань харахада, багаханшье һаа, досоонь ехэ уужам, багтаамжатай шэнги. Тиин 16 һурагшадта эндэ һуугаад ябахань ехэл зохид байха.

Буряад Уласай толгойлогшо Алексей Цыденов: Гэрһээ һургуули хүрэтэр ябахадань хүүгэдтэмнай аятай зохид, дулаан ба аюулгүй байхыень түлѳѳ шэнэ автобусууд абтана. Тэдэнэй зариманиинь холын аймагууд руу ябашанхай. Харин мүнөө эндэ үшөө гаража үрдеэгүй автобусууд байна.

Шэнэ автобусууд үшөө 3 һургуулида ошохоёо бэлэн болоод байна: Новая Брянь, Галтай, Усть-Алтачей гэһэн нютагуудта ябахань. Энэ жэлдэ бүхыдөө һургуулиин 53 автобус абтаад байна. Һүүлэй 9 жэлэй туршада бюджедэй элдэб шатануудһаа 490 автобус абтаа.