Ивалгын аймагай Поселье һууринда амбулатори харин Нурселенида ФАП нээгдэжэ түрүүшынгээ зониие угтаба. Энэ барилга «Зравоохранение» гэһэн Үндэһэн түсэлэй аргаар бэелүүлэгдэбэ. Бүхыдөө энэ хэрэгтэ 21,47 сая түхэриг гаргашалагдаа.
- Ород Уласай Юрэнхылэгшэ Владимир Путин хүн зоной элүүр энхэ байг, ажаһуугшаднай гэрһээ холо ошонгүй эмшэдэй арга абажа байг гэжэ элирхэйлэн тэмдэглэдэг. Тэрэнэй даабари дүүргэжэ хүдөө һуурингуудта эмнэлгын газарай байшангуудые баринабди. Танай нютагта эмнэлгын шэнэ газарнуудай нээгдэжэ, ашаглалгада тушаагдажа байхадань таанадаар хамта баярлажа байнаб. Хоёр нютагай 4000 гаран эрхэтэд һаруул, шэнэ байшан дотор арга абаха аргатай болобо. Эмшэдтэ ажалдань амжалта, харин ивалгаархидта элүүр энхые хүсэнэб! – гэжэ Буряад Уласай Толгойлогшо Алексей Цыденов хэлэбэ.
Поселье һууринай эмнэлгын газарта 737 ехэ бага зон бүридхэлдэ байна. Өөрынгөө нютагай ажаһуугшадые аргалхаһаа гадна хүршэ Сужа һууринай арад зондо туһаа хүргэжэ байха болоно.
- Анхандаа эндэхи ажаһуугшад Сужа нютагай абулаторида хүрэжэ эмшэдтэ хандадаг бэлэй. Тиишээ хүрэхэ гээшэнь баһа холо болоно гээшэ аабза. Эмшэдшье хэмһээ ехээр хүн зониие үзэдэг байгаа. Харин мүнөө шэнэ байшантай боложо зарим бэрхэшээлнүүдээ шиидхээбди, - гэжэ эмшэд хэлэнэ.
Юрэдөө хоёр нютагай ажаһуугшад болон эмнэлгын газарай эмшэд баяртай байнад.
Telegram
TikTok
Youtube
ВКонтакте
Одноклассники
Twitter
RSS-лента
LIVE