Барилга заһабарилгын ажал хэгдэнэ Холбоото уласай «Элүүрые хамгаалгын эхин шатын хэһэг һэльбэн шэнэлэлгэ» түсэлэй шугамаар 2025 ондо Буряад Уласта шэнэ объектнүүд нээгдэхэ.

Нижнеангарскда 992,5 хорёолжон метрэй талмайда 130 саяһаа үлүү сэнтэй поликлиникэ, Түнхэндэ 882 хоёролжон метрэй талмайтай поликлиникэ нээгдэхэ. Түнхэнэй аймагай түбэй эмнэлгын газарай поликлиникэдэ 98 сая түхэриг гаргашалагдаха. Тиихэдэ Хориин аймагай түбэй эмнэлгын газарай поликлиникэдэ 138 сая түхэриг, Ахын аймагай түбэй эмнэлгын газарай поликлиникэдэ 86 сая түхэриг гаргашалагдаха юм. Шэнэ байшангууд тус тустаа 1057 ба 600 дүрбэлжэн метрэй талмай эзэлхэ.

Буряад Уласай Элүүрые хамгаалгын яаман, эмнэлгын эмхи зургаанууд конкурс үнгэргэжэ, гүрэнэй хэлсээнүүдые баталжа, түргэн суглуулагдадаг гурбан амбулатори, хоёр ФАП абаха юм. Тиихэдэ аймагуудай түбэй эмнэлгын дүрбэн газарта ехэ заһабарилга эхилхээр хараалагдана. Тэрээнһээ гадуур Тарбагатайн аймагай Вознесеновкэ һууринда 2-дохи поликлиникын амбулатори баригдаха. Энэ хэрэгтэ 37 сая түхэриг гаргашалагдаха. Баргажанай аймагай Баянгол ба Улан һууринуудта 130 хоёролжон метрэй талмайтай эмнэлгын амбулаторинууд бодхоогдохо. Баунтын аймагай Уакит ба Усть-Джилинда тосхонуудта ФАП–ууд бии
болохо. ФАП бүхэн 13 сая түхэригэй сэнтэй. 68 хоёролжон метрэй талмай эзэлхэ юм. Аймагуудай түбэй эмнэлгын газарнуудта ехэ заһабарилга хүлеэгдэнэ.

Баргажанай аймагай эмнэлгын газарта уһаар хангалгын һужаанууд, дулаа үгэлгын системын приборнууд шэнэлэгдэхэ. Баунтын аймагай түбэй эмнэлгын газарта, Маловский тосхоной амбулаторидо мүн заһабарилга хүлеэгдэнэ. Тэрээнһээ гадуур Хяагтын аймагай түбэй эмнэлгын газарай орой шэнэлэгдэхэ, 4-дэхи дабхарта заһабарилга болохо. Хэжэнгын аймагай эмнэлгын газарта түймэрһөө һэргылэлгын системэ табигдаха, оройнь шэнэлэгдэхэ,
бусад ажалнууд хүлеэгдэнэ. 2025 оной эсэстэ Буряад Уласай аймагуудай ажаһуугшад мүнөө сагай эрилтэдэ таарама түхеэрэлгэнүүдтэй, һаруул уужам кабинедүүдтэй шэнэ байшангуудта эмнэлгын шанартай туһа абажа эхилхэ.

- Элүүрые хамгаалгын эхин шатын хэһэг һэльбэн шэнэлхэ хэрэг манай һалбариин гол бодолго болоно. Мүнөө жэлдэ түргэн суглуулагдадаг байшангуудай технологи анха түрүүшынхиеэ томо поликлиникэнүүдтэ хэрэглэхэбди. Иимэ байшангууд түргэн сагай туршада бодхоогдодог, эд зөөриин талаар гаршань бага, - гэжэ Буряад Уласай Засагай газарай Түрүүлэгшын орлогшо-элүүрые хамгаалгын сайд Евгения Лудупова тэмдэглэбэ.

Һануулхада, үндэһэтэнэй «Эдэбхитэй ута наһан» түсэлэй «Элүүрые хамгаалгын эхин шатын хэһэг һэльбэн шэнэлэлгэ» гэжэ холбоото уласай түсэлэй шугамаар ажаһуугшадта эмнэлгын шанартай туһа үзүүлхэ талаар ажал үргэлжэлхэ. Тэрэнэй түлөө эмнэлгын газарнуудай материально-техническэ бааза һайжаруулагдаха.