Октябриин 21-дэ болоһон суглаан дээрэ Буряад Уласай Толгойлогшо Алексей Цыденов, буряад хэлэ үзэхэ талаар хэрэгсэлнүүдые бүтээхэ хэрэгтэ нэгэ хэдэн даабаринуудые үгэһэн байна.
«Яндекс оршуулагша» гэжэ нэрэтэй бүридхэлдэ буряад хэлэнэй оршуулга бии болохынь тула, байгша ондо ажал ябуулагдажа эхилһэн юм. Ерэхэ жэлэй эхиндэ «Бэлиг» түбэй мэргэжэлтэд ород хэлэнһээ буряадта 100 мянган мэдүүлэл оршуулаад байха ёһотой.
- Бүхы гурим соогоо бэшээтэй байха ёһотой гэһэн эрилтэ «Яндекс» эмхи манай урда табина. Бүхыдөө нэгэ сая мэдүүлэл оршуулбал, хэмэл «ухаан бодолые» буряад хэлэндэ һургахабди. Тиихэлээрээ хэлэмнай мүнхэрхэ, - гэжэ «Бэлиг» түбэй захирал Баир Балданов хэлэбэ.
Бүхы шалгалта, хиналтын һүүлээр багсаахада 2025 һүүл багаар «Яндекс оршуулагша» туршалгын түхэл дурадхагдаха. Энэ ажалаа түсэбһөө түрүүн хэжэ дүүргэхэеэ оролдохо хэрэгтэй гэжэ Буряад Уласай Толгойлогшо хэлэһэн юм.
- Буряад хэлэнэй хэрэглэхэ оршон үргэдхэхэ хэрэгтэ һүүлэй оньһон арга боломжонууд хэрэглэгдэхэ ёһотой. Буряадаар һуралсалай арганууд болон наадануудые зохёоһон зониие дэмжэхэ хэрэгтэй, - гэжэ болбосоролой болон эрдэм ухаанай яаманай сайд Валерий Поздняков хэлэбэ.
Зарим һургуулинуудта ном заахадаа хэшээлээ буряад хэлэн дээрэ үгэхэ туршалганууд эхилхэнь. Энэ түсэлэй түрүүшын шата хадаа «Школа России» гэһэн һуралсалай түсэл буряадта оршуулха болоно. Һурагшадай 1-хи ангида үзэхэ 4 ном оршуулха хэрэгтэ 3 сая түхэриг гаргашалха тухай Алексей Самбуевич даалгаба. Тэрэнэй хажуугаар багшанарай мэргэжэл дээшэлүүлхэ болоно.
Хоёрдохи шатань буряад хэлэндэ оршуулагдаһан номуудай можо нютагай болон федеральна зиндаагай шалгалта. Удаань энэ номоо номуудай федеральна огсолборидо оруулха. Энэ ехэ ажалай дүн боложо шэнэ номууд, сахим номууд, ажалай дэбтэрнүүд хэблэгдэжэ гараха.
Telegram
TikTok
Youtube
ВКонтакте
Одноклассники
Twitter
RSS-лента
LIVE