Сэбэрлэлгын хэрэгсэлнүүд заһабарилагдана Улаан-Үдын ажаһуугшадай хойшолонгуудые сэбэрлэжэ байдаг хэрэгсэлнүүдые һэльбэн шэнэлэлгэдэ гаршалаха мүнгэн дээшэлүүлэгдээ.

Улаан-Үдын сэбэрлэлгын хэрэгсэлнүүдые заһабарилгада нэмэлтэ мүнгэн федеральна һанһаа үгтэхэ. Харин энээнһээ урид энэл хэрэгтэ 2,5 миллиард түхэриг гаргашалагдаа һэн. Буряад Уласай һанһаа 78,2 сая түхэриг шэглүүлэгдэхэ. Тэрээн тухай дансада Буряад Уласай Толгойлогшын орлогшо Евгений Луковников гараа табиба. Тиигэжэ энэ жэлдэ заһабарилгын хэрэгтэ 3,9 миллиард хүрэтэр гаргашань дээшэлүүлэгдэбэ.

Заһабарилгын һүүлээр ашаглагдажа эхилхэдээ бүхэли үдэрэй туршада 130 мянган куб сэбэрлхэ аргатай болохо. Тиихэдээ тон һайнаар муухай уһа сэбэрлэхэнь гээшэ.

- Түсэлэй еһоор заһабарилгын ажал үргэлжэлхэ, үшөө дээрэнь уһа озоноор баяжуулха станци баригдаха. Түсэблэлгын данса «ДАР/ВОДГЕО» гэһэн эмхи бэлдээ. Сэлэнгын баруун эрьедэ оршоһон сэбэрлэлгын түхеэрэлгэнүүд яһала томо эмхи болоно ха юм даа. Тус хэрэгсэлнүүдээ заһабарилхадаа Байгал далайгаа аршалха тон ехэ ажал бүтээхэбди, - гэжэ Буряад Уласай Толгойлогшын орлогшо Евгений Луковников хэлэбэ.

Захирлтаһаа хэһэг:

03.07.2007 ондо абтаһан №2359-III «Буряад Уласай мүнгэн һангай талаар» гэһэн Буряад Уласай хуулиин 32.3 статьягай ёһоор:

1. Байгал далайда шудхан ородог гол мүрэнүүдые сэбэрлэхэ талаар барилга ябуулха, болбосон түхэлтэй болгохо хэрэгтэ мүнгэ гаргашалха тухай дансада нэмэлтэ, һэлгэлтэ оруулха.

Бүхыдөө энэ хэрэгтэ 2024 он болотор 12 миллиард түхэриг шэглүүлэгдэхэ. Тэрэнэй һүүлээр бүхы эрилтэдэ таарама сэбэр уһан гараха зэргэтэй. Тиихэлээрээ Байгал далайдамнай шудхан ородог гол мүрэнүүд сэбэр болохо.

Юрэнхылэгшэ Владимир Путинай зарлигаар Буряад Уластамнай 21 сэбэрлэлгын түхеэрлгэнүүд баригдаха. Түрүүшын иимэ хэрэгсэл байгша ондо Выдрино һууринда ашаглалгада тушаагдаа һэн гэжэ һануулая. Тиихэдээ тон удхатай ажал ябуулагдажа байна гээд Алексей Цыденов хэлээ һэн.

Байгал далайда шудхан ородог эгээл томо Сэлэнгэ мүрэндэ хаягдадаг уһан сэбэр, һайн шанартай болоходоо загаһа нугаһаншье олорхо ха юм даа. Энэл мүрэнөөр дээшээ түрьһэеэ хаяхаяа омоли загаһан гарадагынь мэдээжэ. сэбэр уһанда түрьһэлхэеэ үшөө олон загаһан дээшэлдэг болохо гээшэ гү?