Албанай хэрэгээр Хориин аймагаар Буряад Уласай Толгойлошо Алексей Цыденов ажалайнгаа хэрэгээр Хориин аймаг хүрэжэ ошобо. Социальна һалбариин хэдэн байшангуудай байдал шалгаһан байна.

Алексей Цыденов Георгиевкын дунда һургуулида хүрэжэ багшанартай уулзаба. Тус һургуули 6 байшанһаа бүридэнэ. Ажалшадыеь һургуулингаа талмай зохид болгохо гэжэ яһала хүдэлнэ. Һургуулиин дэргэдэ 2 ТОС байгуулагдаад ажаллана.

- Һургуулидамнай 66 һурагшад үзэнэ. Нютагтамнай залуушуул олон, тиимэһээ һурагшад байха. Залуу багшнара һургуули үзэжэ байна, - гэжэ һургуулиин захирал Екатерина Кузьмина хэлэбэ.

Эхин ангиин һурагшадай үзэдэг байшан аяар 1968 ондо баригдаһан. Тэрэнь хуушаржа шэнэлэлгэдэ орохоор болонхой. Дулаасуулгын шэнэ хэрэгсэлнүүдые тодхохо болон дулаан туалет бариха шухала.

2020 ондо хоол барилгын байшан шэнэлэгдээ, бүхы юумэн эрилтэдэ таарамаар зохёогдоо. Харин мүнөө һургуулиин ажалшад шэнэ спортзалтай болохо дуратай байнад: Ямар нэгэн түсэлдэ орожо шадахагүй гүбди? – гэжэ, Буряад Уласай Толгойлогшодо хандабад.

- Спортзал бариха талаар арга мүрыень бэдэржэ туршахабди. Ондоо түсэлнүүдһээ мүнгэнэй үлэбэл танай һургуулиин спортзалда шэглүүлхэбди. Һургуулиин байшан шэнлэлгэдэ орохоор болоод байна гэжэ харабабди. Бүхыдөө Буряадтамнай энэ талаар ажалнай түсэбэй ёһоор ябана. нэгэшье барилга зогсоогүй, ажал хэгдэһээр, - гэжэ Алексей Цыденов нютагай зонтой уулзахадаа хэлэбэ.