Будаадын шажанай уласхоорондын II хуралдааниие угтуулан Зүблэлэй талмай дээрэ ёгоозорнуудай марафон эмхидхэгдэхэнь

Хэмжээ ябууулга августын 6-да үглөөнэй 8 сагта эхилхээр түсэблэгдэнэ. Өөрыгөө олохые, сэдьхэлэйнгээ байдал тэнсүүритэй болгохые зүдхэһэн уладта ёгоозорнуудые һажаахыень зүбшөөгдэнэ.

– Мянган зоной хабаадалгатай йога гээшэ – будаадын шажанай хуралдаанай олон үлхөө хэмжээ ябуулгануудай нэгэн мүн. Ёгоозорнуудай марафондомнай хара мянган хүн сугларха гэжэ бидэ бата бэхеэр мэдэнэбди. Бэеын тамирай, соёлой түрүү барижа ябаһан мэдээжэ хүнүүд бидэ заабол ерэхэбди гэжэ мэдүүлгэнүүдээ тушаагаад байна. Гэбэшье, тэдэнэйнгээ нэрэнүүдые августын 6 болотор нэрлэнгүй, нюуса болгон баряад байхабди. Заалһаа ерэжэ, эдэбхитэйгээр йога-марафондомнай хабаадагты. Угаа һонин байха, - гэжэ, - Буряад Уласай Толгойлогшын, Засагай газарай хүтэлбэрилэгшын орлогшо Ирина Доржиева уряална.

Асанануудай «Наранай бурхан, мэндэ!» («Сурья Намаскар») гэжэ үлхөөе арба гаран жэлэй дүй дүршэлтэй ёгоозорнууд Софья Хабаркова, Лина Дашиева бэеэрээ харуулжа, һонирхогшодые һургаха.

- «Наранай бурхан, мэндэ!» гэжэ асанануудай үлхөөе бидэ будаадын шажанай уласхоорондын II хуралдаанда зорюулнабди. Тиигэжэ бидэ тэрээндэ дардам сагаан зам нээнэ гээшэбди. Бэеэ, сэдьхэлээ үнинэй һоридог ёгоозорнууд, юрэ һонирхогшод бултадаа Зүблэлтэ талмай дээрэ сугларжа, Наран баабайгаа дуратайгаар мэндэшэлхэ гээбы, сэдьхэлээ номгоруулха, өөрөө өөр тухай улам гүнзэгы мэдэсэтэй болохые эрмэлзэхые оролдохо арга олоһондоо баясаха, - гэжэ Софья Хабаркова үгэлнэ.

«Будаадын заншалта шажан, тэрээндэ мүнөө үе сагай үһэрилгэнүүд» гэжэ ниитэ гаршагтай Будаадын шажанай уласхоорондын II хуралдаан  Буряад Уласта Улаан-Үдэ хотын болон Ивалгын дасанай газар уһан дээрэ 2024 оной августын 12-то эхилээд, августын 14 болотор үргэлжэлхэ гэжэ «Буряад үнэн» сонинойнгоо уншагшадта һануулаябди. Хари 10 гүрэн хуралдаанда лаб хабаадаха тухайгаа мэдүүлээ: Энэдхэг, Хитад, Вьетнам, Шри-Ланка, Лаос, Мьянма, Монгол, Камбоджо, Непал, Бангладеш, Пакистан.

Хуралдаанай нээлгын баяр ёһолол гарагай гурбанда, августын 13-да Улаан-Үдэ хотын бэеын тамирай, соёлой ордондо болохо. Будаадын шажанай һуралсалай, түбэд заншалта эмнэлгын, ухаа номгоруулгын асуудалнууд зүбшэгдэхэ. Гадна хабаадагшад будаадын шажан байгаали хамгаалга хоёрые холбожо, үшөө тиихэдэ заншалта баялигууд тухай хөөрэлдэхэ, уласхоорондын бадаршалга болон аяншалга тухай хэлсэхэ юм. Августын 14-дэ хуралдаан Ивалгын дасанда «Хамбын хүрээдэ» - Оросой Холбоото Уласай Будаадын шажантанай заншалта Сангхын түбтэ үргэлжэхэ Хуралдаанай айлшад «Бурхан багшын магтаал» гэжэ хурал хуралсаха, XII Бандида Хамба Лама Даша Доржи Этигэловэй эрдэни мүнхэ бэедэ һүгэдэн мүргэхэ. Оросой Сангхын оруулһан дурадхалай ёһоор Ивалгын дасанай газар дээрэ Бандида Хамба Лама Даша Доржо Этигэловэй эльгээлтэ бэшэгүүд зүбшэн хэлсэгдэхэ. 2024 ондо Бандида Хамба Ламанарай байгуулгын мүндэлһөөр 260 жэл гүйсэбэ – түүхэтэ энэ ушарта амяараа хэсэг зорюулагдаха.

Хуралдаанда бүридхэл хуулита сайт дээрэ хэгдэнэ: https://reg.buddha-forum.ru/, тэрэ хабаадагшадта сэдэбүүдээр хубаагдаһан хуралдаанай талмайнуудые үзэхэ арга олгоно, тэдэнь һуралсал болбосоролой, соёлой хубинууд болгожо хубаарилагданхай.

0+