Июлиин 27-до дэлхэйн «Алтаргана-2024» нааданда хабаадагшадай баяр ёһололой жагсаал болон нааданай туг үргэлгэ эмхидхэгдээ. Буряадай түлөөлэгшэдые уласай Толгойлогшо Алексей Цыденов хүтэлбэрилөө.
Баярай жагсаалай һүүлээр тэрэ хабаадагшадые халуунаар мэндэшэлээд, хүндэтэйгөөр угтан абаһандань эмхидхэгшэдтэ баярые хүргөө:
«Үндэр заяатай, һайхан һанаатай, дэлгэр сэдхэлтэй буряад-монгол арад зоноо амаршалнаб, мэндэ! Буряад соёлоо хүгжөөхэ, мандуулха зорилготой «Алтаргана» нааданай hайндэрөөр! Мяха нэгэн, шуһа нэгэн, хэлэ нэгэн буряад-монгол угсаатамнай! Арад зонойнгоо нэрэ hүлдые алтан дэлхэй дээрэ үргэжэ, буряад хэлэеэ, ёhо заншалаа сахижа, дэмжэжэ ябая!
Алтан наранай мандаа сагта,
Алтарганын ургаа сагта
Монгол, буряад Арадуудай
Моридой түбэрөөн бү таһараг!»
«Алтаргана-2024» нааданай айлшад болон хабаадагшад, амар мэндээ! Эртэ урда сагһаа хойшо буряад арад түүхэеэ, үндэһэн үнэтэ зүйлнүүдээ, өөрын онсо шэнжэеэ хүндэлжэ ябадаг. Арад зомнай ёhо заншалаа, соёлоо хэдэн зуун жэлнүүдтэ һэтэ нагинаар сахижа шадаа, тиигээд мүнөөдэр ганса сахижа ябана бэшэ, харин эдэбхитэйгээр хүгжөөнэбди. Талын харгана ургамалай яажа амидаралай ба ажамидаралай тэгшэ байдалые тэмдэглэһэнтэй адли, мүнөөдэрэй «Алтаргана-2024» наадан арад зоноймнай һүр һүлдэеэ, үндэһэн шэнжэ шанараа наринаар сахижа байһаниие эли тодоор батална.
Энэ жэлдэ наадамнай айлшадаа хүндэ ямбатайгаар угтан абадаг Монгол орондо, түүхын ба соёлой гүнзэгы холбоотой газар дээрэ үнгэржэ байна гэжэ тэмдэглэхэдэ, илангаяа баяртай байна. Эндэл, нүхэдэйнгөө, адли һанал бодолтой хүнүүдэй дунда байхадаа, манай зүрхэ сэдьхэл дулааржа, хамтын үндэһэ яһатамди гэһэн омогорхолоор халин дүүрэнэ. Бидэ хоёр оронуудайнгаа хоорондо һайн хүршэ, тогтоһон нүхэсэлэй заншалнуудые үндэрөөр сэгнэнэбди. Энэ жэл онсо удха шанартай.
- Халхын голдо илалта туйлаһаар 85 жэлэй ой тэмдэглэнэбди - арадуудаймнай эрхэ сүлөөгэй, бэеэ даанхай байдалай түлөө тэмсэлдэ баатаршалгын, нэгэдэлэй һүлдэ тэмдэг болоһон удха шанартай үйлэ хэрэг ха юм. Энэ хадаа арадуудаймнай аха дүүгэй харилсаанай манай хамтын түүхэдэ бата бэхи байһые үшөө дахин онсолһон шухала хуудаһан болоно.
«Алтарганын» наадан юрын һайндэр бэшэ, харин буряад арадай нэгэдэлэй, соёлоймнай баялигай шухала һүлдэ тэмдэг болоно. Мүнөөдэр арадай аман зохёолһоо, арадай урлалһаа эхилээд, заншалта наадан, гар урлал хүрэтэр үндэһэн соёлойнгоо олон янза баян байһанда үшөө дахин баярлан бахархаха арга боломжо бидэндэ олгогдобо. Удха шанартай энэ хэмжээ ябуулга үнгэргэхэдэ, халуунаар угтажа, туһалжа байһан Монголой арад зондо үнэн зүрхэнһөө баярые хүргэнэбди. Танай зошод буудал ба сэдьхэлээ дэлеэд угтажа байһантнай маанадай нягта харилсаае, бэе бэеэ ехэтэ хүндэлдэгые бодотоор харуулна.
Энэ жэлдэ «Алтарганые» үндэр хэмжээндэ үнгэргэхые хүсэ шадалаараа оролдоһон найр нааданай эмхидхэгшэдтэ онсо баярые хүргэе. Эршэ хүсэтэй, зохёохы арга шадабаритай, соёлоймнай заншалнуудые сахиха, хүгжөөхэ эрмэлзэлтэй бүхы хабаадагшадта баярые хүргэнэб. «Алтаргана» хүн бүхэнэймнай һүр һүлдэ боложо, баяр баясхалан түхөөжэ, нүхэсэлэй, хамтын ажалай шэнэ харгы зам сэхэлжэ байг лэ!
Һайндэрөөр, хүндэтэ нүхэд! Соёлнай һалбаржа, арадуудаймнай хани барисаан бата бэхи боложо, Халхын голой баатарлиг үйлэ хэрэгүүдэй дурасхаал мүнхэ байг лэ!
Telegram
TikTok
Youtube
ВКонтакте
Одноклассники
Twitter
RSS-лента
LIVE