Хяагта хотодо хүүгэдэй поликлиникын байшан шэнээр баригдаба Барилга жэлэй туршада ябуулагдаа.

«Буряад Уласай эмнэлгын һалбариин шэнэлэлгын түрүүшын шата» гэһэн түсэлэй аргаар поликлиникын байшан шэнээр баригдаба. Хяагта хотын ажаһуугшадые энэ баяраарнь Буряад Уласай Толгойлогшо Алексей Цыденов холоһоо холбоо барижа амаршалба.

- Февралиин 1-дэ Хяагта хото ажалаараа ошоо һэм. Ажал яһала һайн ябажа байгаа, Сагаан һарын һайндэр болотор дүүргэхэбди гэжэ барилгашад найдуулаа һэн. Мүнөө эндэ хүдэлхэ һайн мэргэжэлтэдтэй болохо ёһотойбди. Бэрхэшээл байна, энэ асуудал дээрэ хүдэлнэбди. Ажаһуугшаднай һайн шанартай эмнэлгэдэ хүртэхэ ёһотой, - гэжэ Алексей Самбуевич тэмдэглээ.

Хүүгэдэй шэнэ поликлиника 100 хүниие үдэр бүри үзэжэ байха арга шадалтай юм. Аяар 568 дүрбэлжэн талмайда 4 таһаг боложо хубаагдаад хүдэлмэриеэ ябуулха. Тус байшанай барилга 2022 оной май һарада эхилһэн.

Барилгада түсэлэй ёһоор 34 сая түхэриг гаргашалагдаа, үшөө тиихэдэ 13,7 сая түхэриг Буряад Уласай һанһаа нэмэгдэжэ үгтөө. Тэрэнэй хажуугаар эмнэлгын хэрэгсэлнүүдые, болон эд бараа худалдажа абахадань 9,5 сая түхэриг үгтөө. 

- Хяагтын хүүгэд шэнэ һаруул эмнэлгын газарта ерэжэ бэеэ үзүүлхэ аргатай болоһондонь баяртайб. Хяагтада 5600 хүүгэд ажаһууна, 4 педиатр хүдэлнэ. Аймагай больницын ахамад врач Туяна Пурбо-Доржиевнагай ашаар эндэ эмшэд ерэжэ ажаллажа байна, - гэжэ Буряад Уласай элүүрые хамгаалгын сайд Евгения Лудупова хэлэбэ.