Сэрэгэй тусхай хэмжээ ябуулгада хабаадажа байһан сэрэгшэдээ дэмжэхэ гэжэ Буряадаймнай ажаһуугшад концерт-марафонай үедэ 500 мянган түхэригһөө дээшэ мүнгэ суглуулба Сугларһан мүнгэндэнь бүхы хэрэгтэй юумэнүүд абтаха.

«С музыкой к победе» гэжэ нэрлэгдэһэн дуу хатарай үдэшэдэ хүрэжэ ерэһэн нютагаархиднай 504 мянган түхэриг мүнгэ суглуулаа.

- Сугларһан бүхы мүнгэн «Содействие»  гэһэн жасада оруулагдаха. Сэрэгшэдэй тусхайтаар захил хэһэн хэргсэлнүүдые худалдан абахабади. Нэгэдэбэл илахабди! – гэжэ Буряад Уласай Толгойлогшо Алексей Цыденов хэлэбэ.

Энэ марафон-тоглолтодо Буряадаймнай түрүү дуушад, хатаршад болон зүжэгшэд оролсожо хабаадаа. Анха түрүүшынхиеэ Номгон далайн флодой дуу хатарай ансамбль Владивосток хотоһоо хүрэжэ ерээд тоглобо. Тэдэнэй тоглолтын нэгэ хэһэгынь Буряадаймнай Баатар хүбүүн, Ород Уласай Герой Алдар Цыденжаповта зорюулагдаһан байгаа. Үшөө тиихэдэ Буряадаймнай Толгойлогшо өөрынгөө найруулан бэшэһэн «Родина в огне» гэжэ поэма тайзан дээрэһээ бэеэрээ уншажа үгэбэ.

Тоглолтын урдахана харагшад «Жёны героев» гэжэ фотовыставка, Гүрэнэй архивай бэлдэһэн Сталининградай байлдаанай 80-н  жэлэй ойдо зорюулагдаһан «Ни шагу назад!..», дэлгэсэнүүдые үзэн хараха аргататай байба.