Улаан Армиин сэрэгшын шарилынь нютаг дээрэнь угтаба Родион Табинаев 1943 онһоо хойшо һураггүйгөөр үгы болоһон гэжэ тоологдодог һэн.

Сентябриин 26-да Улаан-Үдэ хотын онгосын буудалда Улаан Армиин сэрэгшэ Родион Григорьевич Табинаевай шарил угтаба. Буряад оронһоо дайнда ябаһан хүбүүе түмэр хүзүүбшээрэнь бэдэрэлгын бүлэг Украина гүрэндэ 2019 оной март һара соо олоо. Сэрэгшэ фронт руу 78 жэл түрүүн ябаһан байна. Харин 1943 онһоо хойшо тэрээн тухай ямарш мэдээсэл ерээгүй байһан. 

Буряадай засагай газарай түрүүлэгшын ниигэмэй талаар орлогшо Агууехэ дайнай 75 жэлэй ойн баярай хэмжээн соо бэдэрэлгын ажал ябагдажал байна гэжэ тэмдэглээ юм. Тиин, энэ жэл Халхин-Гол дээрэхи дайлалдаанай 80 жэлэй ойн баяр тэмдэглэгдэнэ. 

- Бэдэрэлгын ажал нэгэшье зогсонгүй ябана. Тиимэһээ дайн дээрэ наһа бараһан зоной түрэлхид, дүүнэрэнь иимэ хэрэг бүтэжэ ябахада ехэл үнэ сэнтэй гэжэ һанана юм. Родион Григорьевич дайнда ябахадаа, гэр бүлэтэй, дүрбэн үхибүүдтэй байһан юм, - гэжэ Вячеслав Цыбикжапов тэмдэглээ.

 - Нэн түрүүн Родион Геннадьевич ондоо аймаг нютагта ажаһуудаг байгаа. Һүүлээрнь Хэрэн руу гэр бүлэтэйгээ нүүгээ юм. Теэд Хэрэнһээ дайн руу ошоо. Родион Табинаевай нэгэ басаган гурбан хүбүүн гэртээ үлээ. Эжыдэнь ехэл хүндэ байгаа. Харин ямаршье бэрхэшээлнүүдые дабажа шадаа юм – гэжэ Вера Константиновна Табинаева, сэрэгшыг түрэлэнь хубаалсаа.  

Онгосын буудалһаа сэрэгшын шарилынь Түнхэнэй аймаг руу абаадаа. Тэндэ Родион Табинаевай урагань угтажа, сентябриин 27-до 13:00 сагта Хэрэнэй Соелой парк соо хүдөөлгын еһолол үнгэрөө. 

Мэдээсэл:

Табинаев Родион Григорьевич, 1905 оной февраль һара соо Эрхүү можын Боохоной аймагай Үхэр нютагта түрэһэн. 1940 ондо гэр бүлэтэйгээ Буряат Монголой АССР-эй Түнхэнэй аймаг руу нүүгээ. 1940 оной июлиин хорин зургаанай 1941 он болотор Түнхэнэй райпотебсоюзай юрэнхы нягталан бодогшоор ажаллаа. 

Түнхэнэй аймагай сэрэгэй комиссариад июлиин 27-до 1941 ондо дайнда абаадаа. Бага сержантаар орожо, март һарайн 1943 ондо һураггүй үгы болоһон юм.  Тэндэ Курскын дүхэригһээ бэшэг ерэһэн байха. Харин лаб хаана наһа бараһаниинь мэдэгдэнэгүй. Март һарын 1943 ондо Харьков хото доро гэжэ һанамжа бии юм. Тэндэһээ холо бэшэ энэ жэлэй хабар шарилынь ологдоһон.

Родион Табинаев гэжэ хүзүүбшээрэнь Минск хотын мэргэжэлтэн мүн лэ Тольятти хотын һайн дуралтанай ажалшан элирүүлээ. «Мүнхэ наһан руу алхамал» гэһэн шагнал гэр бүлэдэнь барюулагдаа.