Шэнэ харгы ашаглалгада тушаагдаба Буряад Уласай хүдөө нютагуудаар харгынууд заhабаригдаһаар. Энэ удаа Ивалгын аймагай Доодо-Ивалга, Хойто-Бэе hууринуудта асфальтаар хуушагданхай шэнэ харгынууд ашаглалгада тушаагдаба.

Ивалгын аймаг ниислэл хототой зэргэлээд байhан хадаа бусад аймагуудта ороходоо түргэн хүгжэнэ. Шэнэ 6 hургуули баригдаа, тиимэhээ hайн шанартай харгынууд ехэл шухала асуудал болоод байгаа. Һүүлэй 5 жэлэй туршада Ивалгын аймагай харгынуудые заhабарилгада 450 миллион түхэриг hомологдоhон байна.

- Доодо-Ивалга нютагай hомоной даргын орлогшо Олон жэл соо иигэжэ шорой замаар ябадаг байгаабди. Мүнөө хадаа шэнэ hургуули нээгдэжэ, энэ гудамжа дээрэмнай поликлиникэ байна, сэсэрлигнай байна. Тиигээд хүн зондомнай амар болоол даа. Буряадтамнай харгынууд баригдажа байхадань ехэ һайшаалтай, - гэжэ Доодо-Ивалгын һомон даргын орлогшо Александр Цыретаров хэлэнэ.

Буряадай Толгойлогшо Алексей Цыденов Доодо-Ивалгын шэнэ харгы нээлгэндэ хабаадажа, шанартай, аюулгүй харгынуудые заhабарилга саашадаашье үргэлжэлүүлэгдэхэ гээд тэмдэглээ. Ивалгын аймагта харгын үшөө 3 участок асфальтаар хушагдаха гээд найдуулаа. Алексей Цыденов Доодо-Ивалгын ажаhуугшадтай хамта харгы нээлгын еhолол үнгэргөө.

Доодо-Ивалга hууринда хамта дээрээ 638 метр утатай харгы капитальнаар заhабарилагдаа. Энээндэнь нэн түрүүн нютагай ажаhуугшад ехэтэ баярлаа.

- Үдэртөө энэ харгыгаар ажалдаа ошодог ерэдэг гээшэб. Мүнөө иимэ гоё һайн шанартай харгытай болободи. Ехэ баяртай байнабди. Манай Буряад Уласай толгойлогшо Алексей Самбуевич Цыденовта, аймагайнгаа болон нютагайнгаа гулваада баярые, баясхаланиие хүргэнэбди. Һайн даа, - гэжэ Доодо-Ивалга нютагай ажаhуугша Марианна Онгоева хэлэнэ.

Хойто-Бэе hууринда Иволгинская, Стартовая гудамжанууд асфальтаар хушагдаа. Тиин мүнөө харгын бүхы дүримүүдтэ харюусанхай шанартай харгыгаар зон ябадаг болоо. Шэнэ hургуулида, «Алтан сэсэг» гэжэ хүүгэдэй сэсэрлигтэ автобусуудай ябахаар зохистой байдал байгуулагдаа.